ಸಂಸ್ಕೃತಿ ಪ್ರೋತ್ಸಾಹಕ ಯೋಜನೆಗಳು

ಸೌಲಭ್ಯ

• ಪ್ರಕಟಿತ ಗ್ರಂಥಗಳಿಗೆ ಧನಸಹಾಯ : ಕತೆ, ಕಾದಂಬರಿ, ನಾಟಕ, ಕವನ ಮುಂತಾದ ಸೃಜನಶೀಲ ಪ್ರಕಾರಗಳನ್ನು ಬಿಟ್ಟು ಸೃಜನೇತರ ಪ್ರಕಾರಗಳಲ್ಲಿ ಬರುವ ವಿಮರ್ಶೆ, ಸಾಂಸ್ಕತಿಕ ವಿಶ್ಲೇಷಣೆ, ಜೀವನ ಚರಿತ್ರೆ ಮುಂತಾದ ಪುಸ್ತಕಗಳಿಗೆ ಧನಸಹಾಯವನ್ನು ನೀಡಲಾಗುವುದು
• ಗೌರವಧನ ಮತ್ತು ಮಾಸಾಶನ:ಕಷ್ಟ ಪರಿಸ್ಥಿತಿಯಲ್ಲಿರುವ ವಯಸ್ಕ ಕಲಾವಿದರಿಗೆ, ಸಾಹಿತಿಗಳಿಗೆ ಪ್ರತಿ ತಿಂಗಳೂ ಗೌರವಧನ, ಮಾಸಾಶನವನ್ನು ನೀಡಲಾಗುತ್ತಿದೆ. ಇದಲ್ಲದೆ ರಾಷ್ಟ್ರಮಟ್ಟದ ಪ್ರಶಸ್ತಿ ಹಾಗೂ ಕೇಂದ್ರ ಅಕಾಡೆಮಿಗಳಿಂದ ಪ್ರಶಸ್ತಿ ಪಡೆದ ಗಣ್ಯರಿಗೂ ಗೌರವಧನ ನೀಡಲಾಗುವುದು
• ಸಾಹಿತಿ ಕಲಾವಿದವರಿಗೆ ವೈದ್ಯಕೀಯ ನೆರವು : ಅನಾರೋಗ್ಯ ಪೀಡಿತರಾಗಿರುವ ಸಾಹಿತಿ ಕಲಾವಿದರಿಗೆ ವೈದ್ಯಕೀಯ ವೆಚ್ಚವನ್ನು ನಿಯಮಾನುಸಾರ ಮರುಪಾವತಿ ಮಾಡಲಾಗುವುದು
• ಹೊರನಾಡ ಕನ್ನಡ ಸಂಸ್ಥೆಗಳಿಗೆ ನೆರವು: ಕನ್ನಡ ಭಾಷೆ, ಸಾಹಿತ್ಯ ಮತ್ತು ಸಾಂಸ್ಕತಿಕ ಚಟುವಟಿಕೆಗಳನ್ನು ಹಮ್ಮಿಕೊಳ್ಳಲು ಹೊರರಾಜ್ಯಗಳಲ್ಲಿರುವ ಕನ್ನಡ ಸಂಘ ಸಂಸ್ಥೆಗಳಿಗೆ ಕಟ್ಟಡ ನಿರ್ಮಾಣ, ಸಲಕರಣೆಗಳ ಖರೀದಿ, ಕನ್ನಡ ಶಾಲಾಭಿವೃದ್ಧಿ ಹಾಗೂ ಕನ್ನಡಪರ ಕಾರ್ಯನಿರ್ವಹಣೆ ಮತ್ತು ಇನ್ನಿತರ ಸಾಂಸ್ಕತಿಕ ಚಟುವಟಿಕೆಗಳಿಗೆ ಧನಸಹಾಯ

ರಿಯಾಯಿತಿ

ಹೊರನಾಡು ಮತ್ತು ಹೊರದೇಶಗಳಲ್ಲಿರುವ ಕನ್ನಡಿಗರು ಮಾನಸಿಕವಾಗಿ ಕನ್ನಡ ನಾಡಿನ ಜೊತೆ ತಾದಾತ್ಮ್ಯ ಹೊಂದಿದ್ದರೂ ಭೌಗೋಳಿಕ ಕಾರಣಗಳಿಗಾಗಿ ಕನ್ನಡ ನಾಡಿನ ಭಾಷೆ ಮತ್ತು ಸಂಸ್ಕೃತಿಯ ಜೊತೆ ನಿರಂತರ ಸಂಪರ್ಕ ಸಾಧಿಸಲು ಸಾಧ್ಯವಾಗಿರುವುದಿಲ್ಲ. ಇದಕ್ಕೆ ಪರಿಹಾರರೂಪವಾಗಿ ಕನ್ನಡ ನಾಡಿನ ಹಿರಿಯ ಕಲಾವಿದರು ಮತ್ತು ಸಾಹಿತಿಗಳನ್ನು ಹೊರನಾಡಿನ ಮತ್ತು ಹೊರದೇಶದ ಉತ್ಸವಗಳನ್ನು ಆಯೋಜಿಸಿ ಅಲ್ಲಿ ಕಲೆ ಪ್ರದರ್ಶಿಸುವ ಮೂಲಕ ಭಾವನಾತ್ಮಕವಾಗಿ ಅಲ್ಲಿನ ಕನ್ನಡಿಗರನ್ನು ತಾಯ್ನಾಡಿನೊಂದಿಗೆ ಬೆಸೆಯುವ ಅಪರೂಪದ ಪ್ರಯತ್ನವಾಗಿ ಈ ಉತ್ಸವಗಳನ್ನು ಆಯೋಜಿಸಲಾಗುತ್ತಿದೆ.